ईतर
दलितांच्या नावावर वर्षभरात दिड कोटींचा डल्ला मारणा-या माहूर न.पं. ला सहाय्यक आयुक्तांचा दणका…
"माहूर न.पं. च्या भ्रष्ट कारभाराविरूद्ध प्रशासन अॅक्शन मोडवर..! "रामगड पोखरून भ्रष्टाचाराचा 'गड' उभारणा-यांचे धाबे दणाणले..!"
(महाराष्ट्र न्युज नेटवर्क)
(बाबाराव कंधारे)
किनवट/माहूर
मागील अनेक दिवसांपासून आपल्या ‘कु-कर्माने’ चर्चेत असलेल्या माहूर नगर पंचायतीचे नवनवीन कारनामे दैनंदिन स्वरूपात उघड होत असून तब्बल दोन कोटींच्या घरकुल घोटाळ्यावर शिक्कामोर्तब करून माहूर न.पं. च्या मुख्याधिका-यांनी थेट जिल्हाधिका-यांकडे तक्रार केल्यानंतर आता दलितवस्तीच्या दीड कोटी रूपयाच्या निधीवर डल्ला मारणा-या माहूर न.पं. ला सहायक आयुक्तांनी ‘तगडा’ दणका देताना ‘रामगड’ पोखरून भ्रष्टाचाराचा ‘गड’ उभारण्याच्या नादात थेट जंगलात निधीची विल्हेवाट लावल्याप्रकरणी कारवाईचा बडगा उगारून तात्काळ प्रकरणाची माहीती व तसेच याबाबतचा वस्तूस्थितीदर्शक अहवाल सादर करण्याचे आदेश माहूर न.पं. ला दिले आहेत…
पवित्र माहूरगडाच्या पायथ्याशी वसलेल्या नगरपंचायतीमध्ये सध्या भ्रष्टाचाराचा ‘नग्न नाच’ सुरू असून, गरिबांच्या हक्कावर डल्ला मारणारी एक टोळी मागील अनेक वर्षांपासून सक्रिय आहे. त्याच टोळीमार्फत अनुसूचित जातीच्या विकासासाठी असलेल्या नागरी वस्ती सुधारणा योजने’च्या तब्बल १ कोटी ५० लाख रुपयांच्या निधीवर याच ‘पांढरपेशा दरोडेखोरांनी’ डल्ला मारला असून दलित वस्त्या आजही अंधारात आणि चिखलात असताना त्यांच्या विकासासाठी प्राप्त झालेला पैसा चक्क निर्जन डोंगरात आणि बेकायदेशीर थडग्यांना उजळवण्यासाठी खर्च करण्याचा निर्लज्जपणा माहूर नगरपंचायतीने केल्याचा खळबळजनक गौप्यस्फोट माहूर येथील केशव भगत यांनी लेखी तक्रारीतून संपुर्ण पुराव्यासह केल्यानंतर या महाघोटाळ्याची गंभीर दखल घेत नांदेडचे जिल्हा सहआयुक्त यांनी काल दि. ३० जानेवारी २०२६ रोजी माहूर न.पं. च्या मुख्याधिकाऱ्यांना ‘झापत’ तात्काळ अहवाल सादर करण्याचे आदेश दिले आहेत…तर माहूर नगर पंचायतीत कार्यरत असलेल्या भ्रष्ट साखळीच्या मुसक्या आवळण्याची तयारी प्रशासनाने पूर्ण केली असून लवकरच ‘प्रकरणातील अलिबाबा चालीस चोर’ सर्वांसमोर येणार असल्याचे दिसून येत आहे…
दरम्यान माहूर नगरपंचायतीमध्ये भ्रष्टाचाराची ‘गंगा’ प्रवाहीत करणा-या आराखडा तयार करणाऱ्यापासून ते कंत्राटदारापर्यंत आणि अंतिम मान्यता देणाऱ्या लोकप्रतिनिधींपर्यंत सर्वांनीच अक्षरश: आपले हात धुवून घेतले असून जिल्हाधिकाऱ्यांच्या आदेशातील अट क्र. ५, १८, २१ आणि २६ चे उघडपणे उल्लंघन करण्यात आले. ज्या ठिकाणी एकही दलित कुटुंब नाही, अशा ‘देवदेवेश्वरी मंदिर रोड ते अविनाश दत्त मंदिर’ या परिसरात केवळ निधी लाटण्यासाठी ५० लाखांचा रस्ता मंजूर करण्यात आला. यासाठी पुरातत्व विभाग, वनविभाग आणि महसूल विभागाची कोणतीही पूर्वपरवानगी न घेता ऐतिहासिक रामगड किल्ल्याचा वारसा सुरुंगाने उद्ध्वस्त करण्याचा ‘देशद्रोही’ प्रकार येथे जाणिवपुर्वक घडविला असल्याचे जळजळीत वास्तव कुणीही नाकारू शकत नाही… परिणामी सामाजिक कार्यकर्ते केशव भगत यांनी पुराव्यानिशी या घोटाळ्याचा भांडाफोड केल्यानंतर प्रशासनाचे डोळे उघडले असून सहआयुक्तांनी दिलेल्या पत्राने माहूर नगरपंचायतीत एकच खळबळ उडाली आहे. तथापि, सूत्रांच्या माहितीनुसार, जिल्हा प्रशासनाने आता केवळ कागदी घोडे न नाचवता थेट कारवाईचा ‘बडगा’ उगारला असून ज्या मुख्याधिकाऱ्यांनी आणि अभियंत्यांनी खोटा ‘स्थळ पाहणी अहवाल’ देऊन शासनाची दिशाभूल केली त्यांच्यावर तातडीने बडतर्फीची कारवाई होण्याची शक्यता असल्याचे प्रशासनातील काही बड्या अधिका-यांनी सुतोवाच केले आहे…
“विशेष म्हणजे या घोटाळ्यातील सर्वात बोचरी बाब म्हणजे मागासवर्गीयांच्या हक्काचा पैसा धार्मिक अतिक्रमणांना आणि स्वतःच्या फायद्यासाठी वापरण्यात आल्यामुळे संबंधित दोषींवर केवळ आर्थिक गुन्हेच नव्हे, तर ‘अॅट्रॉसिटी ॲक्ट’ नुसार फौजदारी गुन्हे दाखल करण्याची आणि भ्रष्ट नगरसेवकांचे पद रद्द करण्याची मागणी जोर धरत असून सत्तेच्या जोरावर अगदी काही काळातच हजारो कोटींचे मालक बनलेल्या या ‘नव्या श्रीमंतांचे’ साम्राज्य आता प्रशासकीय चौकशीच्या चक्रीवादळात अडकून ‘ठिक-या’ होणार हे मात्र निश्चित झाले आहे… किंबहूंना सत्तेच्या ‘मस्ती’त गरिबांच्या तोंडचा घास हिसकावून तोच घास डोंगरात गाडणाऱ्यांना आता कायद्याच्या चौकटीत उभे केल्याशिवाय शांत बसणार नसून हा लढा शेवटपर्यंत जाईल.. तसेच दोषींना तुरुंगात पाठवल्याशिवाय स्वस्थ बसणार नसल्याचा दृढनिश्चय तक्रारदार केशव भगत यांनी आमच्या वृत्तवाहिनीशी बोलताना व्यक्त केला आहे….
