घरकुलाच्या थकीत बिलासाठी माहूर नगर पंचायतीला लाभार्थ्यांचा घेराव…!

  “विशेष म्हणजे सन २०१७ पासून शहरातील प्रधानमंत्री आवास योजनेतील बिले थकीत असलेल्या लाभार्थ्यांची संख्या तब्बल पंधराशे ते सतराशे असून लाभार्थ्यांच्या एकूण रकमेपैकी प्रत्येकी किमान 20 ते 70 टक्के रक्कम लाभार्थ्यांना मिळणे बाकी आहे. या रकमेचा आकडा पाहील्यास माहूर नं.पं. कडून तब्बल पाच ते सात कोटी रूपये घरकूल लाभार्थांना येणे बाकी आहे. याबाबत अनेकवेळा मोर्चे, उपोषणे व आंदोलने करण्यात आली. परंतू लाभार्थ्यांच्या खात्यात थकीत रक्कम मिळू शकली नाही. यामागचे नेमके गौडबंगाल कोणते..? यासाठी माजी उपनगराध्यक्षा सौ. अश्विनी आनंद पाटील तुपदाळे यांच्यासह काँग्रेसचे तालुकाध्यक्ष आनंद पाटील तुपदाळे तसेच शहरातील घरकूल लाभार्थ्यांनी देखील माहूर नगर पंचायत विरोधात एल्गार पुकारला असून 2017 पासून ते आजपर्यंत घरकुल लाभार्थ्यांची थकीत रक्कम कुठे दडली..? ती रक्कम लाभार्थ्यांच्या खात्यात आजवर जमा का केली गेली नाही..? याबाबतचा संपुर्ण छडा लावल्याशिवाय स्वस्थ बसणार नसल्याचेही तुपदाळे यांनी सांगितले आहे…