वाई बाजार येथे भारतीय बौद्ध महासभेच्या महिला व युवक शाखांची नवनिर्वाचित कार्यकारिणी जाहीर..!

किनवट/माहूर

   भारतीय बौद्ध महासभेच्या वतीने माहूर तालुक्यातील वाई बाजार येथे महिला व युवक शाखांच्या नवनिर्वाचित कार्यकारिणीची घोषणा उत्साहपूर्ण वातावरणात करण्यात आली असून माहूर तालुका अध्यक्ष ॲड. छंदक वाठोरे यांच्या अध्यक्षतेखाली झालेल्या या बैठकीत समाजप्रबोधन, संघटनात्मक बळकटीकरण आणि बौद्ध संस्कारांच्या प्रसाराची जबाबदारी नव्या कार्यकर्त्यांकडे सोपविण्यात आली आहे. 

दरम्यान महामानवांच्या विचारांचा प्रसार करण्याचा निर्धार करताना भारतरत्न डॉ. बाबासाहेब आंबेडकर यांच्या विचारांचा प्रसार व प्रचार करणे, बौद्ध धम्माची शिकवण समाजातील प्रत्येक घटकापर्यंत पोहोचविणे, महिला व युवकांचे संघटन मजबूत करणे आणि कुटुंबात बौद्ध संस्कार रुजविणे या उद्दिष्टांसाठी नवनिर्वाचित पदाधिकाऱ्यांनी सक्रियपणे कार्य करावे, असे मार्गदर्शन व आवाहन यावेळी करण्यात आले. यावेळी नवनिर्वाचित पदाधिकाऱ्यांचा पुष्पगुच्छ देऊन सत्कार करण्याबरोबरच उपस्थित मान्यवरांनी त्यांच्या भावी सामाजिक वाटचालीस शुभेच्छा दिल्या. त्यामुळे नव्या कार्यकारिणीच्या माध्यमातून वाई बाजारसह माहूर तालुक्यात भारतीय बौद्ध महासभेचे कार्य अधिक प्रभावी, शिस्तबद्ध आणि व्यापक होईल, असा विश्वास उपस्थितांनी व्यक्त केला. या बैठकीस प्रमुख मार्गदर्शक म्हणून भारतीय बौद्ध महासभेचे माहूर तालुका अध्यक्ष ॲड. छंदक वाठोरे उपस्थित होते. तसेच ज्येष्ठ पत्रकार सुभाष खडसे, विहार समितीचे अध्यक्ष प्रल्हाद खडसे, दिलीप पठाडे, सिद्धार्थ पारधे, मिलिंद कंधारे, मुनेश्वर थोरात यांच्यासह अनेक मान्यवर आणि मोठ्या संख्येने स्थानिक उपासक व उपासिका उपस्थित होते.

विशेष म्हणजे, वाई बाजार येथे भारतीय बौद्ध महासभेच्या महिला व युवक शाखांची नवनिर्वाचित कार्यकारिणी जाहीर होणे, ही केवळ पदाधिकाऱ्यांची निवड नसून समाजप्रबोधन, बौद्ध धम्माचा प्रसार आणि सामाजिक परिवर्तनाची जबाबदारी स्वीकारण्याची संधी आहे. किंबहूंना भारतीय बौद्ध महासभेचे कार्य केवळ कार्यक्रम आयोजित करणे, पदाधिकाऱ्यांची नियुक्ती करणे किंवा जयंती-पुण्यतिथी साजरी करण्यापुरते मर्यादित न राहता, डॉ. बाबासाहेब आंबेडकरांनी अपेक्षित केलेल्या समताधिष्ठित समाजनिर्मितीच्या दिशेने असणे महत्त्वाचे असून बौद्ध महासभेची अधिकृत घटना, नियमावली आणि संघटनेने निश्चित केलेली उद्दिष्टे यांचा संदर्भ घेऊन पुढील धोरणात्मक कर्तव्ये समजाऊन घेवून ती यशस्वीरित्या पार पाडण्याचा संकल्प नवनिर्वाचित पदाधिका-यांनी यावेळी केला आहे….